Bahama vacation

Nov yog thaum 5/15/09 Angela thiab Kyle nkawv coj koj txiv wb mus ua si . Peb mus Florida thiab caij nkoj mus rau Bahama, thawj hnub peb mus txog Florida peb mus da dej ua si tom ntug dej hiav txwv nyob hauv lub palm beach uas zoo nkauj heev, peb tseem ua si tsis tau txaus tab sis peb xav mus nrhiav mov noj tso no ces peb thiaj los lawm.

Hnub thib 2, peb rov mus da dej dua nyob hauv Forth Lauderdale beach, yog ib lub beach uas zoo nkauj kawg li thiab muaj neeg coob coob tuaj da dej ua si. yog ib hnub uas tshav ntuj heev, thiab peb muaj kev lom zem kawg li.

Peb ua si hauv dej lom zem heev ces peb txawm tsis nco dab los pleev tshuaj ntxiv rau peb, ces thaum peb los pw hmoo ntawd peb sawv daws tej sub pwg kub nyhiab sab heev, mob tau 3 hnub mam li zoo.
Peb tseem xav xav da dej uas si ntxiv thiab vim yog lom zem heev, yog li no hnub kawg uas peb yuav los tsev, peb rov qab mus da dej ua si ib hnub ntxiv thiab, tab sis hnub no peb sawv daws hnav tsho da dej, kom thiaj li tsis kub nyhiab.

Hnub thib 3, peb nce nkoj mus rau Bahama. Nyob hauv lub nkoj mas muaj khoom noj qab heev thiab muaj txiv ntoo txhua yam ntau heev, peb noj mov ntau ntau tas mus li xwb ces koj txiv wb nyhav dua qub tuaj lawm. kuv cov ris tsho tsis haum kuv hnav lawm, kuv hais tias thaum twg kuv los tsev tso kuv mam yoo mov. Vim tias nyob hauv nkoj muaj zaub mov qab heev thiab ntau heev, ces kuv yeej yoo tsis tau li.

Thaum peb mus txog Bahama peb tau mus caij ib lub nkoj me mus saib cov neeg muaj nyiaj cov tsev uas loj loj thiab zoo zoo nkauj heev, uas nyob raws ntug dej hiav txwv.
Dhau ntawd peb mus ua luam dej saib ntses. Yog ib qho uas peb sawv daws nyiam heev rau qhov hauv qab dej hiav txwv zoo nkauj heev, thiab muaj ntau yam ntses sib txawv thiab muaj xim sib txawv uas zoo nkauj heev! Yog thawj zaug uas koj txiv wb pom hais tias nyob hauv qab dej hiav txwv zoo li cas.
kuv ib txwm tsis xav txog hais tias nyob hauv hiav txwv yuav tshav ntuj nrig zoo tib yam li saum ntiaj teb no thiab.
Thaum kuv pom hauv hiav txwv zoo nkauj heev kuv xav tias Vaj Tswv mas tsim hauv dej hiav txwv thiab saum lub ntiaj teb zoo nkauj tib yam nkaus, thiab xis nyob heev rau txhua yam uas muaj sia.
Qhov uas zoo tshaj rau kuv yog qhov uas Angela thiab Kyle nkawv nrog wb mus ua ke.
Kuv ntseeg tias yog koj txiv wb mus wb xwb ces yeej yuav tsis lom zem npaum li no.
Kuv paub hais tias Angela thiab Kyle neb nyuam qhuav ua neej xwb es neb yeej tsis muaj nyiaj los neb tseem siv nyiaj ntau heev coj koj txiv wb mus ua si zaum no thiab.
Kuv xav kom neb paub tias kuv yeej zoo siab heev thiab ua neb tsaug kawg nkaus li.
Kuv tsis muaj dab tsi rau neb tab sis kuv yuav thov kom Vaj Tswv pub koob hmoov ntau ntau rau neb nawb mog.